ගලහ ලූල්කඳුර වත්තේ ලයින් කාමරයක තාවකාලිකව පදිංචියට පැමිණි තරුණ යුවළක් තමන්ගේ මාස පහ හමාරක් වයසැති දරුවා නිවෙසේ තනි කර දමා විදේශගත වූ බව කියන සිද්ධියක් සම්බන්ධයෙන් පොලිසිය පරීක්ෂණ පවත්වයි.
මඩකලපුව වාකරය ප්‍රදේශයේ පදිංචි බව කියන මේ යුවළ මීට සති දෙකකට පමණ ඉහත වත්තේ ලයින් කාමරයක තාවකාලිකව පදිංචියට පැමිණ ඇත. ඔවුන්ට නවාතැන් දී ඇති මහලු කත සැබෑ ලෙසම ඔවුන්ගේ ඥාතියකුද යන්න සම්බන්ධයෙන් සැකයක් මතු වන බවත්, අදාළ මහලු කත මානසික රෝගී තත්ත්වයකින් පෙළීම ඊට හේතුව බවත් පොලිසිය පවසයි. මහලු කාන්තාව මානසික රෝගි තත්ත්වයකින් පෙළෙන බව දැන මොවුන් එම නිවෙසේ තාවකාලික පදිංචියට පැමිණියේ දරුවා එහි තබා විදේශගත වීමේ අරමුණින්ද යන්න පිළිබඳ පොලිසිය සැක පළ කරයි.
තරුණ යුවළ වතු පාලනාධිකාරියට දී ඇති තොරතුරු අනුව ඔවුන් දෙදෙනාම 21 වැනි වියේ පසු වන හෙළිව ඇත. මොවුන් පෙරේදා (22) වතු නිවාස පේළියේ පදිංචි පුද්ගලයකු අමතා තමන් විදේශගත වන බවත් කාමරයේ සිටින දරුවා කාට හෝ දී රැක බලා ගැනීමට කටයුතු කරන ලෙසත් ඉල්ලා තිබේ.
පසුව ඔහු ඒ සම්බන්ධව වතු පාලනාධිකාරිය දැනුවත් කර ඇති අතර, වත්තේ පවුල් සෞඛ්‍ය සේවිකාව මඟින් දරුවා දෙල්තොට රෝහලට ඇතුළත් කර ඇත. මවුකිරි දීමේ පහසුකම් රෝහල සතුව නැති බැවින් දරුවා පේරාදෙණිය රෝහලට යොමු කළ බව ගලහ දෙල්තොට රෝහලේ සෞඛ්‍ය වෛද්‍ය නිලධාරි කපිල අතපත්තු මහතා කීය. මේ සම්බන්ධව මධ්‍යම පළාත් සෞඛ්‍ය අධ්‍යක්ෂවරයා සහ මහනුවර දිස්ත්‍රික් ප්‍රාදේශීය සෞඛ්‍ය අධ්‍යක්ෂවරයා දැනුවත් කිරීමටද ඒ මහතා පියවර ගෙන තිබේ.
සිද්ධිය සම්බන්ධයෙන් ගලහ පොලිසියට දැනුම් දීමෙන් පසු පොලිසිය ඒ සම්බන්ධයෙන් විශේෂ විමර්ශනයක් ආරම්භ කර ඇත. දරුවාගේ මව සහ පියා ඇමතුම දුන් ජංගම දුරකතනය පෙරේදා (22) ප.ව. 3.00න් පමණ පසු ක්‍රියා විරහිතව තිබෙන බවත්, මොවුන් සැබෑ ලෙසම විදේශගත වූයේද නැත හොත් එසේ අඟවා මෙරටේම රැඳී සිටින්නේද යන සැකය පොලිසියට මතුව තිබේ.
The post ලූල්කඳුර ලයින් කාමරයක මාස පහ හමාරේ බිලිඳා දමා මවුපියන් මාරු වෙලා appeared first on දිනමිණ.
Source:: Dinamina